Gennaro Gattuso i gëzohet tre fitoreve në shtatë ditë, që kanë ngritur kuotat e Milan dhe e kanë bërë më solide pankinën e tij. Por jo cdo gjë që shkëlqen është ar. Nga Franca vjen një lajm bomë: Arsene Wenger është shumë pranë kuqezinjve. Nuk ka dyshime 'France Football', sipas të cilëve në javët e fundit ka patur kontakte të shpeshta mes ish-trajnerit të Arsenal e drejtuesve të Milan. Francezi, i sponsorizuar nga Paul e Gordon Singer, do të ketë edhe një rol menaxherial.
“Do të jetë diku në fillim të vitit të ardhshëm, por nuk e di se ku. Kam pushuar mjaftueshëm. Kam parë shumë futboll e më mungon", ka thënë kohët e fundit Wenger, që në 6 majin e kaluar udhëhoqi Arsenal në Emirates në ndeshjen e tij të fundit në shtëpi pas 22 vjetësh pankinë.
Kohët e fundit emri i tij ishte afruar me Bayern Mynih e Real Madrid, por tani në Francë 'France Football' e lidh me Milan, ku do të ketë gjithashtu edhe një rol menaxherial, si ka bërë në kohët kur ishte në Londër tek Topcinjtë.
