Infeksioni bakterial në linfonoduset e qafës e jo vetëm. Josip Ilicic ka dashur të tregojë periudhën e tij të vështirë. "Ajo që i ndodhi Astori më mbeti në kokë për ditë të tëra. Nuk arrija të flija më sepse e mendoja gjithnjë. E kur u sëmura këtë verë mendova vërtetë se do të më ndodhte edhe mua. Ishte një periudhë në të cilën kisha frikë të shtrihesha për të fjetur”, ka thënë slloveni i Atalanta për Corsport.
"Kisha frikë. Mendoja: po nëse nesër nuk do të zgjohem? Si do bëj pa e parë më familjen time? Ka patur persona që me problemin tim kanë përfunduar në koma. Infeksioni tek unë qendroi rreth linfonoduset e qafës, personave të tjerë i është shpërndarë. Kur e mendoj...", shtoi ai i tmerruar. Por jeta e tij ka ndryshuar: "Le të themi se shoh përtej futbollit. Bëj detyrën time në fushë, pastaj kthehem në shtëpi tek të dashurit e mi që i dua gjithnjë pranë. Jeta është e shkurtër".
Ilicic kishte arritur deri aty sa mendoi edhe të linte futbollin: "Nuk shihja më ndeshje në tv, mendova vetëm familjen. Në një pikë doja vetëm të mund të kthehesha të ecja si njeri normal, edhe pa qenë më futbollist”.
