Akoma kritika për José Mourinho, që vijnë nga figura të rëndësishme të Manchester United. Pothuaj të gjithë ish-futbollistët e Djajve të Kuq kanë dalë kundër portugezit e këtë herë radha ishte e Erica Cantona, që në Angli me United ka bërë histori. Francezi ka komentuar ashpër situatën në Old Trafford dhe humbjen e fundit me Juventus: “Është mënyra se si luan United që nuk më bind – ka pranuar francezi - Në futboll edhe mund të humbasësh, por të paktën ndonjë risk mund ta ndërmarrësh. Juventus fitoi me 70% të zotërimit të topit, e gjithë kjo nuk ka ndodhur kurrë me Ferguson në pankinë. Për Mourinho mund të them se nuk është njeriu i duhur për këtë tip pune”.
Cantona me Manchester United ka fituar 4 Premier League e 2 Fa Cup në 5 sezone, gjithnjë nën drejtimin e Sir Alex Ferguson. E për të ardhmen nuk është aspak optimist: “Po humbasim një gjeneratë talentesh, që nuk mund të inspirohen nga ky lloj futbolli. Shumë identifikohen me lojën aktuale të rivalëve të Manchester City, e kjo është e papranueshme”. Në fund ish-numri 7 ka treguar edhe preferencën e tij për pankinën e Djajve të Kuq: “Tek United nuk i japin asnjë shans ish-lojtarëve, që njohin filozofinë e klubit. Nuk e them se jam ambicjoz për atë pankinë, por sepse është e vërteta. Do më pëlqente të shihja Giggs aty”.
