Ai është një prej aktorëve më të dashur për publikun shqiptar. I njohur me emrin “Ertugrul” nga seriali me të njëjtin emër Engin Altan Duzyatan ka rrëmbyer zemrat e gjithë shqiptarëve.
Megjithatë duket se aktori turk ndodhet në telashe me drejtësinë, pasi një gjykatë turke ka vendosur ta marrë me forcë para trupit gjykues për të dhënë dëshminë e tij në lidhje me një grup hakerash. Këto hakëra akuzohen se kanë vjedhur llogaritë e rrjeteve sociale të 58 personave VIP në Turqi.
18 persona, 3 prej të cilëve nën masën e sigurisë ‘arrest me burg’ po gjykohen për shantazh me qëllim përfitimin e shumave të mëdha të parave nga personazhet e njohur. Ata u vidhnin fjalëkalimet e rrjeteve sociale si Instagram dhe Twitter këngëtarëve dhe aktorëve turq, e më pas i shantazhonin.
Në mesin e shumë personazheve të njohur që ranë pre e hakerave është edhe Neslisah Duzyatan, bashkëshortja e aktorit, Engin Altan Duzyatan.
Në seancë gjyqësore është thirrur si dëshmitar edhe Duzyatan, por ai nuk është paraqitur dhe mosparaqitja e tij ka detyruar trupin gjykues të vendosë ‘sjelljen e tij me forcë’ për të dëshmuar para trupit gjykues.
