Prokuroria për Krimet e Rënda ka sekuestruar videon e transmetuar mbrëmë në programin “Opinion”, ku shfaqej Fredi Alizoti. Oficerë të Krimeve kanë shkuar në selinë e PD ku kanë bërë administrimin e materialit filmik, në cilesinë e provës materiale.
Sipas Prokurorisë, Fred Alizoti luajti rolin e imituesit të zërit të Agron Xhafaj. Ndërkohë mësohet se oficerët kanë shkuar edhe në ambientet e televizionit ku u publikuan pamjet e deputetit të Partisë Demokratike.
Në pamjet e transmetuara, Alizoti nuk ishte në dijeni se po regjistrohet dhe thotë se është marrë në makinë nga Drejtori i Policisë së Shtetit, Ardi Veliu dhe është dërguar në Prokurorinë e Krimeve të Rënda në mënyrë që të pranojë versionin, i cili i shkon për shtat mazhorancës.
“Je me ne, apo me ata”, i ka thënë fillimisht Veliu, Alizotit. Alizoti shprehet se e ka takuar edhe Balla me dy persona të tjerë. Ai tregon sesi po i bëhej presion që të pranonte se ishte ai që kishte folur si Agron Xhafaj në bisedën me “Babalen”.
