Deputetja e PS-së, Elisa Spiropali thotë se opozita ka qëllim vetëm të baltos Shqipërinë pasi sipas saj tashmë ka nisur procesi “screening” për hapjen e negociatave. Sipas saj edhe sulmet ndaj Taulant Ballës bëhen sepse ai është kryetari i grupit parlamentar të PS-së.
“Mjafton të lexoni letrën që përfaqësuesit e opozitës në Komitetin e Stabilizim-Asociimit i kanë nisur përfaqësuesve të BE-së, eurodeputetëve dhe kryetarit të Kuvendit, për të kuptuar që qëllimi është baltosja e Shqipërisë. Ne jemi përpara një vendimi shumë të rëndësishëm, që është çelja e negociatave. Kemi filluar procesin screening. E përfytyroni dot ju një burokrat europian apo një eurodeputet që lexon një letër të tillë ‘me pistoletë te koka komisarit të policisë’, në një kohë kur nga provat e Prokurorisë dhe nga filmimet del që ai nuk ka qenë atë ditë, sikurse del edhe nga qelizat e celularëve. Këto janë prova faktike, konkrete. Kanë dalë edhe videot e komisariatit, edhe pse kanë qenë sekret hetimor. Nuk ka njeri që t’u thotë: Si ka mundësi që ju po mundoheni të merrni peng fatin e Shqipërisë? Sepse këtu nuk po baltoset qeveria, por Shqipëria”, tha Spiropali në emisionin 'Top Talk' në Tch.
