Me 44 vota pro, 5 kundër dhe 5 abstenim, Parlamenti Evropian miratoi të martën raportin për 5 vendet e Ballkanit Perëndimor, përfshirë edhe Shqipërinë. Në raport thuhet se PE ka mirëpritur progresin e Shqipërisë, por eurodeputetët kanë ngritur si shqetësim nivelin e korrupsionit dhe mungesën e efikasitetit në drejtësi.
Në diskutime janë përmendur disa çështje të nxehta si negociatat me Greqinë, veçanërisht respektimin e të drejtave të pakicave në vendin tonë por edhe ndërtimet e Hidrocentraleve në disa lumenj në vendin tonë.
Parlamenti Europian është shprehur i prerë në qëndrimin e tij, se negociatat për anëtarësimin do të hapen kur Shqipëria të përmbushë kushtet e nevojshme, e jo në ndonjë datë të caktuar. Raporti i PE-së konfirmon deklaratën e pak ditëve më parë të Ministrit të Jashtëm të Gjermanisë, i cili u shpreh se nuk ka një datë të saktë për hapjen e negociatave të Shqipërisë me BE.
