Tekniku i përfaqësueses së futbollit, Christian Panucci, ka shpallur listën e 25 lojtarëve që do të grumbullojë në vigjilje të dy ndeshjeve të tetorit të ekipit kombëtar: miqësores me Jordaninë, të mërkurën (10 tetor) në “Elbasan Arena”, dhe eleminatoren me Izraelin në Ber Sheva, (14 tetor), për raundin e tretë të Grupit C1 për Ligën e Kombeve.
Situata e lojtarëve për të përzgjedhur natyrisht është më e mirë se në fillim të sezonit, por problemet tekniku italian i ka të gjitha në sulm. Dëmtimet e Odise Roshi e Armando Sadikut nuk janë rikuperuar ende dhe dyshja është një mungesë që e bën Panuccin me dhimbje koke.
Italiani ka thërritur dy debutues në repartin ofensiv: ish-sulmuesi i Laçit, Myrto Uzuni, që tashmë luan në kampionatin kroat me Lokomotivën e Zagrebit, vjen nga goli i shënuar në fundjavë, ndërsa shansi i parë është edhe për Giaccomo Vrioni e Venezias.
Pavarësisht thërritjes së këtyre dy lojtarëve, ai që ka bërë të lumtur teknikun është Eros Grezda, i rikuperuar tashmë pas dëmtimit dhe me minuta në këmbë me Rangers e Steven Gerrard.
Bashkë me dy sulmuesit, bëhen katër debutuesit në grumbullimin e kuqezinjve. Mbrojtësi, Egli Kaja, që aktivizohet në radhët e skocezëve të Livingstone e Kastriot Dermaku i Kozencës, do ti bashkohen ekspertëve difensiv.
Skuadra përfaqësuese e futbollit do të nisë seancat stërvitore ditën e hënë në kompleksin “Tropikal”, ku dhe do të grumbullohet në vigjilje të këtyre dy ndeshjeve.
Lista e lojtarëve të grumbulluar për sfidat me Jordaninë dhe Izraelin.
