Ish-deputeti Gjok Jaku komandohet drejtor i Hipotekës në Shkodër. Pas arrestimit të ish-drejtorit Zamir Leka dy ditë më parë, është vendosur emri i ri që do të drejtojë ZRPP-në e Shkodrës.
Gjok Jaku ka qenë zv.drejtori i Përgjithshëm i Hipotekës por ka mbajtur edhe një sërë postesh të tjera.
Ai ka qenë kryetar i Bashkisë Lezhë dhe më pas deputet i Partisë Socialiste. Po kështu Jaku ka mbajtur edhe postin e zëvendësministrit të Bujqësisë.
Jaku është prezantuar si kreu i ri në Zyrën e Regjistrimit të Pasurive në Shkodër gjatë ditës së sotme përpara punonjësve të mbetur të hipotekës.
Kreu i Hipotekës Shkodër Zamir Leka u arrestua me akuzën për korrupsion bashkë me juristen Frida Mirashi që u la në “arrest shtëpie”. Përpara ish-drejtorit Leka prokuroria lëshoi urdhër ndalimi edhe për ish-juristin Mirjam Bletaj dhe disa sekserë të dyshuar që u merrnin para të tjerëve për praktika të ndryshme në zyrën e hipotekës së Shkodrës.
Gjykata e Shkodrës i la në “arrest me burg” ish-juristin Mirjam Bletaj dhe dy sekserët e dyshuar Sokol Tirana dhe Johan Zefi, ndërsa dha masën e sigurisë “arrest shtëpie” për shtetasin Ndoc Taraj.
