Ambjenti në Vlorë është turbulluar disi pas humbjes në sfidën direkte me Skënderbeun, ku pas ndeshjes u përfol për acarime mes lojtarëve apo tone të ashpra në analizë. Në fakt nuk ishte nga ato humbje që kalojnë lehtë, për vetë pozicionin e skuadrave dhe madje edhe në pamjet filmike tekniku i Flamurtarit Ilir Daja është parë të mos aprovonte vendosjen e brazilianit Alves në shënimin e golit të parë të Krasniqit.
Tekniku megjithatë ka mohuar të ketë pasur kontradikta mes lojtarëve pas humbjes me Skënderbeun. Në konferencën për shtyp Daja është shprehur se situata është krejt ndryshe nga sa është referuar…
"Sigurisht që ka patur analizë, si pas cdo ndeshje tjetër - ka thënë trajneri kuqezi në vigjilje të ndeshjes me Partizanin, për javën e pestë të Superiores. Madje kemi qenë të qetë dhe askush nuk është përjekur të gjejë një fajtor".
Në fakt, nuk ka shumë kohë për të menduar atë cfarë iku, sepse vetëm tre ditë pas humbjes me Skënderbeun, Flamurtari duhet të luajë një tjetër sfidë delikate, atë përballë Partizanit. Në disfavor të vlonjatëve është fakti se kanë më pak kohë për tu përgatitur dhe për të rikuperuar energji, duke qenë se luajtën të hënën dhe do të zbresin në fushë sërisht të premten.
