Problemet në futbollin shqiptar janë evidente dhe në cdo sezon përsëriten me përpikmëri të frikshme. Futbollistë të papaguar, klube që prishin e ndërtojnë skuadra dy herë në vit, por mbi të gjitha mungesë e theksuar respekti e institucionit të trajnerit. Tre trajnerë të shkarkuar në katër javët e para është praktikisht record edhe për paqendrueshmërinë e futbollit tonë.
Bledar Devolli (ne foto djathtas) rezistoi vetëm tre javë në Kamëz. Edhe pse e filloi me fitore, duke mundur në debutim Tiranën 24 herë kampione, dy humbjet me Partizanin dhe Teutën në Durrës e nxorrën të pavlefshëm teknikun. Devolli u shkarkua menjëherë pas transfertës në Niko Dovana dhe në detyrë erdhi Klodian Duro.
Rekordmeni është Gersi Arbri i Tomorrit (në foto në qendër). Vetëm një ndeshje në detyrë, edhe në atë i pamundur, sepse përfundoi në barazim 1-1 me Lushnjen, por dorëheqje e parevokueshme. Atëherë Devolli ishte i lirë dhe nuk ngurroi të shkonte në Berat.
Një ndeshje më shumë në detyrë për Eriol Merxhën (në foto majtas), që pas dy humbjeve në krye të Elbasanit largohet nga verdheblutë.
“Rezultatet” janë justifikimi direkt i klubeve dhe drejtuesve, por këtu veprohet sikur të gjithë janë për titull dhe promocion dhe harrohet se përpara dy apo tre ndeshjeve vijnë projektet, ato që ideohen për një vit të tërë. Sigurisht që kjo mënyrë e të vepruarit e ka rrëzuar përtokë institucionin e trajnerit, që është ndër më të goditurit.
Janë ndryshuar trajnerë edhe pas arritjeve historike, ose pasi kanë ndërtuar ekipin, madje edhe kur kanë qenë në vendin e parë të renditjes. Gjithësesi, me këtyre cudirave shqiptare është edhe më anormale shkarkimi i tre trajnerëve në katër javë futboll, mes Superiores e Kategorisë së Parë.
Me këtë ritëm duke se do të tejkalohen shifrat e sezonit 2017-18 me 26 trajnerë të shkarkuar në një vit, vetëm në Superiore.
