Afrimi i PDIU-së së Shpëtim Idrizit me koalicionin opozitar të drejtuar nga Lulzim Basha nuk është pëlqyer nga kryetari i PBDNJ-së, Vangjel Dule. Burime nga kjo forcë politike bëjnë me dije se Dule, i cili përfaqëson edhe minoritetin grek, po mendon ndërprerjen e bashkëpunimit politik me Bashën dhe PD-në. Të njëjtat burime nga PBDNJ i thanë Top Channel se një gjë e tillë është diskutuar edhe në një mbledhje të kryesisë së kësaj force politike, ditën e enjte, menjëherë pasi Basha i hapi dyert çamëve të PDIU-së, që drejtohen nga Idrizi.
Gjithçka do të vendoset nga qasja që kryedemokrati Basha do të ketë ndaj Idrizit. Një pritje e tij me krahë të hapura ka shumë gjasa që të largojë PBDNJ-në, njësoj siç ndodhi kur Rama, pasi erdhi në pushtet në vitin 2013 me Vangjel Dulen aleat, afroi në koalicion Shpëtim Idrizin. Atëherë, kjo lëvizje solli reagimin e Dules që doli nga koalicioni i majtë duke iu bashkuar më pas Lulzim Bashës.
Brenda kësaj jave, kryedemokrati Basha pritet të mbyllë dy takime me të dy rivalët politikë, si Dulen ashtu edhe Idrizin, rezultatet e të cilave pritet të përcaktojnë edhe qëndrimin e mëtejshëm të PBDNJ-së në koalicionin opozitar apo jo. Në rast se minoritarët largohen, opozita do të humbasë një deputet, ndërsa afrimi i çamëve të Idrizit nuk i sjell asnjë favor në sallën e Parlamentit./tch
