Përplasja e Champions mes Inter e Tottenham është një ndeshje që pritet të dhurojë shkëndija dhe si e tillë nuk mund të mungonin kujtimet e një protagonisti të madh të Spurs, që pikërisht sfida me zikaltrit i shenjoi kapërcimin në karrierë. Gareth Bale nuk është me me Tottenham, por i kujtohet mirë ajo ndeshje e 8 viteve më parë:
“Ishte me shumë mundësi pika më e lartë e karrierës, për të qenë i sinqertë. Ishte një mundësi e madhe: luanim kundër kampionëve në fuqi të Champions League e ata luanin në fushën e tyre. Luajta shumë mirë dhe tregova se mund të luaja kundër më të mirëve. Nga ai moment nuk pashë më mbrapa dhe besova gjithnjë tek vetja e që atëherë nuk e humba më”.
Kështu Gareth Bale kujton tregolëshin e shënuar kundër Inter në 2010 në Champions League kur vishte ende fanellën e Tottenham. Zikaltrit janë të lumtur që kanë një kundërshtar më pak nga ajo kohë, por duhet të bëjnë kujdes nga një tjetër britanik: Harry Kane eksperti i tregolëshave.
