Bashkia e Tiranës do të nisë nesër në mëngjes fazën e dytë të punimeve për Rikualifikimin urban të Sheshit “Skënderbej”, të cilat synojnë ta kthejnë në identitet lulishten pas monumentit të Skënderbeut, e cila do të jetë një hapësirë tërësisht çlodhëse.
Për të përshpejtuar punimet, Bashkia e Tiranes ka organizuar edhe një plan të ri të lëvizjes së automjeteve, që do të mundesojë zbatimin e projektit. Masat do të fillojnë mbrëmjen e sotme me qëllim që nesër në mengjes të jetë gjithçka gati për të nisur puna për fazën e dytë.
Sipas Planit të Bashkisë së Tiranës, do të ndalohet qarkullimi i automjeteve në segmentin e rrugës “Çamëria”, nga kryqëzimi me rrugën “Ibrahim Rugova” deri në sheshin “ Skënderbej”, e thënë ndryshe, do të ndalohet qarkullimi në segmentin rrugor që kalon para selisë së Partisë Socialiste. Qarkullimi i automjeteve, do të bëhet në rrugën “Ibrahim Rugova” në kryqëzimin me rrugën “Çamëria”, drejtim i detyruar drejt.
Gjithashtu, deri në përfundim të fazës së dytë të punimeve për rikualifikimin e Sheshit “Skënderbej” do të ndalohet qarkullimi i automjeteve në segmentin e rrugës “Ibrahim Rugova”. Qarkullimi i automjeteve nga “Myslym Shyri” deri te bulevardi “Gjegj Fishta”, pra segmenti para Taiwan, do të bëhet me një drejtim lëvizjeje sipas sensit veri-jug.
