Një ditë pasi njoftoi dhënien e shtetësisë shqiptare për kryepeshkopin Janullatos, sot pasi ka bërë vizitën e urimit për ditën e Krishtlindjes, Meta ka folur për mediat lidhur me arsyet e këtij vendimi.
“Përgjigjen më të mirë e ka dhënë Fortlumturia e tij me shprehjen si ‘puna e verës’. Ky është një moment shumë pozitiv i shprehjes së mirënjohjes. Kjo është një vepër të madhe që e ka krijuar me përkushtimin e tij të jashtëzakonshëm duke ngritur nga hiri, Kishën Ordodokse Autoqefale të Shqipërisë me një infrastrukturë të jashtëzakonshme. Shikoni Katedralen përballë, që nuk ekzistonte. Janë investimi i tij, frymëzimi i tij për të krijuar vlera të shkëlqyera”- tha Meta.
Pyetur nëse dhënia e shtetësisë vjen pas deklaratës së dhënë prej vetë Janullatosit se pasardhësi i tij do të jetë një shqiptar Meta iu pergjigj:
“Dua të theksoj se lidershipi i tij në krye të kësaj kishe ka qënë një mundësi e shkëlqyer jo vetëm për Kishën Autoqefale të Shqipërisë duke e afirmuar në gjithë botën ordokse, por duke e promovuar Shqipërinë si një vend me vlera të harmonisë fetare. Fortlumturia e tij gjithnjë ka prediskuar për harmoni. Kjo lidhet me vepren e tij dhe sikurse u shpreh se vera sado më e vjetër të jetë aq më shumë ka, ashtu edhe aq sa më shumë vite të kalojnë nga sot, aq më shumë do të rritet vlera e tij në funksion të bashkëjetesës dhe harmonisë fetare.”
