Debati politik për mënyrën se si do të zgjidhet prokurori i përgjithshëm ka përfshirë furishëm edhe komentuesit e shtypit. Një pjesë e tyre që në këtë rast mbështesin qëndrimet e shumicës parlamentare janë përpjekur ta shfryjnë zhurmën që po bën opozita duke qëmtuar argumenta të ndryshme se përse sipas tyre aleanca PS-LSI po bllofon. Kështu në një artikull sot tek gazeta Mapo: “Beteja për kryeprokurorin është shumë zhurmë për asgjë” (shiko linkun poshtë), Mustafa Nano shkruante se “Beteja për fatin e Prokurorit të Vjetër apo për emërimin e atij të riut, është një teatër, nëpërmjet të cilit duan të fshehin qëllime të tjera”.
http://www.mapo.al/2017/12/beteja-per-prokurorin-e-perkohshem-eshte-shume-zhurme-per-asgje/1
Paralelisht me këtë ide, Skënder Minxhozi në editorialin e tij në Javanews.al të titulluar: “Berisha dhe Meta duan të mbajnë në jetë garantin” e përligjte zhurmën e opozitës me përpjekjen e saj për të mbajtur në postin aktual Adriatik Llallën: “Kjo piskamë vaji që këndohet çdo ditë për fatin e Llallës është në fakt materializimi i frikës trevjeçare që PD e LSI kanë nga përmbysja e sistemit të vjetër klientelist të drejtësisë shqiptare. Prandaj Adriatik Llalla duhet të rrijë sa më gjatë në zyrë, edhe pse pa mandat dhe me një bilanc anonim që nuk i hyn në punë askujt. As atij vetë” shkruante ai(shiko linkun poshtë).
http://www.javanews.al/berisha-dhe-meta-duan-te-mbajne-ne-jete-garantin/
Ndërsa disa ditë më parë, Mero Baze në editorialin e tij në Gazeta Tema kishte një këndvështrim të ndryshëm që shkonte sërish në të njëjtën linjë. Pasi argumentonte se shumica është në të drejtën e saj ta zgjedhë një prokuror me shumicë të thjeshtë ai e shikonte mohimin e PD-së dhe LSI së më shumë sesa një mbrojtje të ligjit, si një aksion për të forcuar aleancën kundër reformës në drejtësi të ngjizur me kohë nga çifti PD-LSI?. Në shkrimin e tij: “Problemi është aleanca jetëgjatë kundër reformës” Baze shkruan:” Të gjithë e dinë që ai është i përkohshëm, për disa muaj derisa të ngrihet KLP, dhe pastaj beteja është në Parlament. E gjithë zhurma nuk është, se mos humbasë Kryeprokurorin e përkohshëm, por se mos humbasin njëri tjetrin. Është një hall që i bashkon tani e dy vjet. Dhe nuk është problemi tek prokurori i përkoshëm, por tek ruajtja e aleancës jetëgjatë kundër reformës” (shiko linkun poshtë). Pra të gjithë në mënyra të ndryshme dhe duke çmontuar argumentat dhe prapamendimet e opozitës arrijnë në përfundimin se nuk ka problem që Edi Rama të zgjedhë një kryeprokuror vetëm me votat e tij.
http://www.gazetatema.net/2017/12/07/problemi-eshte-aleanca-jetgjate-kunder-reformes/
©Lapsi.al
