Dosja e ish shefave të policisë që punuan me Saimir Tahirin, të dyshuar për bashkëpunim me trafikantët e drogës erdhi nga Italia. Lapsi.al njoftoi pak kohë më parë, se gjatë vizitës në Tiranë, Marko Miniti, Ministër i Brendshëm i Italisë solli një dosje të detajuar për emra të zyrtarëve të lartë të përfshirë në trafikun e drogës. Në dosje janë përgjimet, vendet dhe komunikimi kur shefat e policisë kishin bashkëpunuar me trafikantët e drogës.
Dosja “e kopsitur” nga Antimafia italiane ishte produkt i një pune disa-vjeçare, pasojë e shqetësimit në rritje për tonelatat e me kanabis, që vitin e kaluar thyen çdo rekord. Lapsi.al publikoi i pari ekzistencën e kësaj dosjeje, që Marko Miniti la në tryezën e Fatmir Xhafajt. Me shpresën se Fatmir Xhafajt nuk i mungonte vullneti për t’i arrestuar ish shefat e kanabisit, Marko Miniti zbuloi para tij të gjithë punën gjurmuese të italianëve kundër trafikantëve të drogës dhe lidhjet e tyre në policinë shqiptare. Takimi Xhafaj-Miniti u zhvillua me dyer të mbyllura dhe dy ministrat qëndruan vetëm për vetëm, në shqyrtim të listës me emra, që sollën italianët.
Miniti nuk pranoi në takim askënd tjetër veç Xhafës, për shkak të informacioneve delikate që kishin të bënin me zinxhirin drejtues të policisë.
Edhe në mesazhin që dha para policëve shqiptarë, Marko Miniti kërkoi goditjen e “të paprekshmëve”, duke iu referuar shefave të mëdhenj të policisë. Ditën që Miniti, erdhi në Tiranë, Edi Rama fluturoi për në Marok për një aktivitet fare të parëndësishëm.
Kaluan 3 javë nga vizita e Marko Minitit në Tiranë dhe policia nuk bëri asnjë lëvizje. Qartësisht, partnerët italianë kanë pasur pritshmëri të larta ndaj Fatmir Xhafajt. Por paralizimi i policisë, dekonspirimi i aksionit dhe arratisja e ish shefave të kanabisit hedhin hije dyshimi se informacionet sekrete të italianëve u dekonspiruan përmes niveleve më të larta.
Madje edhe ditën kur Prokuroria e Krimeve të Rënda nxorri urdhër-arrestet, policia lëvizi ngadalë, duke i dhënë kohë ish shefave të policisë të fshihen dhe të largohen në drejtim të paditur.
Lapsi.al mësoi se lista e emrave që la Marko Miniti në tryezën e Fatmir Xhafajt është më e gjatë se kaq. Bashkëpuntorë të tjerë të Saimir Tahirit në polici, ish drejtues në qytete të mëdha të Shqipërisë, pritet të shpallen në kërkim, gjithmonë në bazë të provave që kanë sjellë italianët. Në pak ditë do të kuptojmë, nëse këta janë ende në shtëpitë e tyre, apo edhe kësaj radhe e kanë marrë mesazhin e koduar “Bravo çuna!”.© Lapsi.al
